{ اضغط على زر تشغيل حتى تستمتع ..”

Download audio file (Hthean-elTnk.mp3)

كل ما طار الفراش

أعرف أن أمي طفت

يمه ويني ؟!

نامت سنيني عليّ

تلتحف من برد عمري

ما معاي إلا عيونك ..

تقطر الدمعة في بالي ..

تطفي البرد ويجيني

زولك بداخل عيوني

أحضن عيوني وأنام

تهزهزي البرواز أدري

صح يمه ؟؟

مثل ما كنت أتهزهز بأغنياتك

يمه نامي

تمشط الصورة عيونك

مجدلة شيبك تقولي

آآه يانذر نذرته

تفتحين كروت عرس

وترسمين بشوت عرسي

ألبس الأسود في بالك ..

ألبس البني في بالك ..

ألبس الأبيض ترفضين

الكفن يطري في بالك ..

يمه أدري

أدري

همك هو وجودي

هو زواجي

تشوفي عيالي وتموتي

تغربيني لا لمحتي شروق ربعي

تلملميني من زوايا البيت حتى

تتجه للقبلة روحك

تلتقي وياها روحي بكل صلاة

وأعرف أنك

بآخر أيام الضوى

وغافي فيك الفراش

ضايقة من التنك يمه

إيه أنا أدري

ضايقة من التنك يمه

كحتك كأنها بصدري

آه لوني عنك شلته

في ضلوعي .. وجيت أسير

صج تعالي

موعدك عند الطبيب

أذكر إني مسجلة في شهر تسعة

رحتي يمه ولا طاف ؟؟

لا يطوووف

أدري ماعندك يايمه

غيري أحد

ياخذ الكرت ويجدد

كل مواعيد الطبيب

يمه نامي .. نامي يمه

الأسر هو هو نام فيني

والله ما يقوى يزعزع

شخص راضع من حليبك

أو يهز يمه شعره

شعره من ونات شيبك

قولي أقدار وخذتنا ورحنا أسرى

ويعني أسرى ..

ماهو لازم مثل هذا اليوم نعرف

من عدوك / من صديقك

يعني جوع ما أجوع

وأنتِ أصلا تذكرين

عزة النفس ويميني

ما وصلت أكلٍ ولو هي

نفس تدفعني عليه

يعني حرية يا يمه

أجمل الحريات والله

أني أقيد كل عمري

ولا يتضايق صدر شارع

من رئة خطوات فاجر

تاطا مسلم

ما نطق إلا الشهادة

باصبعه و وقف فجر

لا غسلك الدمع يمه .. قولي فدوه

فدوه لعيون الشواطئ

لا غسلها المد قامت

توقظ الناس بفرحها ..

بعد ما كانت حزينة ..

أدري همك

هو زواجي هو وجودي

تشوفي عيالي وتموتي .. مثل همي

إني يا يمه أشوفك

قبل لايطير الفراش

خلي همك مثل همي

إني طالب يد بلادي

ومهرها أبقى أسير

حتى لو طار  الفراش

أنت وينك ؟؟

***

أنت وينك ؟

من زمان كنت ادور

في عيون الناس عنك .. وجه وجه

ولا لقيتك

في زوايا البيت أدور .. في الشوارع

في الصباح للي تشرب غترتك

بالمكان للي فرشته بالجريدة

لما تقرأها وتشرب

كل صباحي قهوتك

واخذ الفنجان حتى

تقرا حظك لي عجوز

ترفع البسمة تقول

فيها لك شي بيتحقق

وفيها له شي ثمين .. ليه ؟

ماقلتي فيها لي شي بيتهدم

وفيها له شي حزين

أثري كنتي تكفرين

إنت وينك ؟

تسأل الأشجار عنك

لما ترمي فوق ظلها .. كل ظلك

لما تسقيها بدمك .. هي تبلك

تنحي لك

تدري إنك لو تغيب .. ينكسر طير وتموت

إسأل الأيام عني .. ولاتدري

أسال نعاس تكسر

من صباحك في وريدي

إسأل شفاه هجرها

من بعادك ماي بارد,,

ليه تتركني أتوسل .. وأتسول

في عيون الناس .. انا اطلب منهم حفنة حنان

أنت وينك ؟!

ماتركت إلا بعباتي

عطر جسمك من صلاتك

وشعرتين بكف مشطك

صافحني وسط بالي .. وأتذكر

(( يالله يمه .. يالله يمه اخطبي لي ..

وإلا يعني ماني رجال بعيونك

شفتي شعرك إلا أفله في زواجي ))

أنت وينك

هذي دارك ما تغير شي فيها

هذا بوكك هذا عطرك هذا مشطك..

إلا ساعة يوم طاحت من يديني إتكسرت

لا تخآف جبت ساعة تشبه اللي تكسرت

أنت وينك

ماتركت إلا عيونك داخل البرواز .. تتبع

وجهتي من وين أروح

ماتركت إلا عيونك

داخل البرواز تسأل

يمه وينك

أنت وينك ؟ ؟